الشاعر محمود المنشاوي يكتب لـ”الفيومية”.. “لمت ف عينها النور”

الشاعر محمود المنشاوي يكتب لـ”الفيومية”.. “لمت ف عينها النور” الشاعر محمود المنشاوي

يقدم محمود المنشاوي- شاعر عامية، شعر جديد بمناسبة مناهضة العنف ضد المرأة قائلاً:

خرجت ف وسط القوم

بعد العتاب و اللوم

نجمة تباهي نجوم

ضحكتها لا تُنسي

كان الظلام حافل

الوحدة شيء سافل

ربك ما كان غافل

خلق السكون أنثي ..

مدت شراع الليل

حاوطت حدود الكون

ف أزاي تكون مجنون

و تداري أوصافها

و أزاي هتوصفها

و أنت البعيد باغي

تحجر علي المكتوب

و تحرف الباقي

تحرمها معانيها

أدم فرح بيها

جاتله دفا و أمان

لمت ف عينها النور

داست على النسيان

أزاي تكون إنسان

من غير ما تديها

حق اللجوء للأرض

و تسبلها الدفة

تحجل و تتخفي

أرسم و عَليِ السور

و أتركلها الألوان

أوعاك تتوه و تدور

ده ف خدّها العنوان

الناس بترمي ندور

ماتسبش ليهم ودن

حاسب يفوت الدور

تلقاك كفيف عريان

تصبح فقير و جعان

من غير ما تحضنها

أنت الوحيد دونها

يجري ف دماك لونها

تجري السنين و تمر

و تدوق ليالي المُر

من غير ما تسكنها

و تكونلك المآوي

صوت السكوت عورة

ضحكتها دي ثورة

تهدم بلاط الخوف

وتكمل الدورة

أمسك ف أيدها و قول

خلي النهار موصول

أشهد بإن الكون

محتاجله ضحكة بتول.

 

الوسوم