الشاعرة بنت الملكة تكتب “انتهاك أنثى”

الشاعرة بنت الملكة تكتب “انتهاك أنثى”
كتب -

تكتب تقى محمد ولقبها الشاعرة بنت الملكة قصيدة بالعامية عن التحرش بعنوان “إنتهاك أنثى”

ملخص الحكاية، إن الطريق مالوش نهاية

وإن الألم وصف البداية

إنتهاك انثى

وروح بتموت

عشان خنثى

مكانه تابوت

 

أنا البنت اللي من جواها روح بتموت

وأنا البنت اللي صار خوفها عذاب مكبوت

وأنا اللي الدنيا سرقتها من الملكوت

عشان الدنيا دي بلِتها بواد هلفوت

 

أنا البنت اللي من غير روح

عشان بارد ملاها جروح

وأنا الشمس اللي بعد غروب

لإن جبان مصيره هروب

بيتمزج بلمستها وهو سعيد

ولا بتفرق معاه دموعها وبرده للوجع بيزيد

ويدفن بإيده فرحتها ويجري بعيد

وبيشكك ف براءتها بكلام ما يفيد

“لابسالي بنطلون وماشية تتمنظر

بفيزون وشيفون وعاجبها دا المنظر”

طب اسمعني بقى يا مجنون يا أغبى مما تتصور

تفاهتك مش سبب كافي عشان بدموعي تستهتر

هقولك كلم’ .. وصفك دون .. عشان ليا ما بتقدر

 

ما لو كان المبرر لبس

وحبة مكياج يا عقول م الجبس

ليه البنت السعودية بسوادها زي ما بتقولوا ما بتعتقوهاش

والبنت السويدية بحريتها زي ما بتشوفوا ما ضايقتوهاش

وليه الطفل اللي لعبته ماسكها

والطفله ببراءتها … ما سبتوهاش

 

العيب مش فينا يا عقول مريضة

ضيعت كل حق لينا وفاكرين إننا صيدة

حقيقي إننا ف أزمة ولازم تصحوا

وإصبح شئ مالوش لازمة إنكم تقسوا

 

ده أصل البنت دي حورية .. ملاك عالأرض

وجعكم خلاها ضحية .. بالطول والعرض

ياريت مانبيعش دي قضية .. ده واجب فرض

 

ولو أمكن لـ تسمعني ومن وقتك تسيبلي مكان

عشان تفهم إي يوجعني وإي خلاني شئ متهان

حقيقي ده كان كلام شعارات بإنه في  شئ بينصفنا كما يُدعى حقوق انسان

وضاع الحق يا خسارة وهفضل اصنفك حيوان

وخد بالك حقيقي الدنيا دوارة

وكما تدين تُدان

 

مهما حكيت انا ما بوصفش

وجع يتعاش يهين دُرة

عاشت بين ناس ما بتقدرش

روح بتموت من جوه ومن بره

وتتعشم ف كل قرار ما يتنفذش

ومن تاني يعيدوا الكرّة ١٠٠ مرة

 

كلاب وبينهشوا ف جسمي ومطلوب اني ما اتكلم

يزيدوا كل يوم وجعي وانا ساكتة وبتألم

ومين يقدر يزيح همي ومن درسي ده يتعلم

وم العتمة يجيب حلمي .. من بعد ما كان خلاص سَلِّم

 

أنا الشجرة ف وقت خريف

ورقها سقوطه وضع مخيف

أزمة مجتمع عايش ف اختلال

شباب اخلاقها ف النازل

عايشة لشهوتها ولا عالبال

بوجع بنت ضحية عُقم مجتمعي

م الهم شالت حِمل جبال

أملها ف ربنا يغير الحال

 

إي يمنع لو تخليلك شوية دم

وتمنع كارثة بنعيشها ووضع يغُم

وتوهبيلي حياة من تاني ابدأها

بزيادانا الهم

إي يمنع لما تفهموا إن حلمي حياة

هتكمل لما توصلوا بيا بر نجاة

 

 

الوسوم